امریکہ(تازہ ترین) سابق امریکی وزیرِخارجہ ہیلری کلنٹن نے اپنا ذاتی ای میل سرور ایف بی آئی کے حوالے کرنے پر رضا مندی کا اظہار کر دیا ہے۔ یہ ای میل سرور ان کے استعمال میں اس وقت تھا جب وہ بطور وزیرِ خارجہ امور سرانجام دے رہی تھی۔تفصیلات کے مطابق ماضی میں سرکاری امور کے لیے ذاتی ای میل کے استعمال پر انھیں تنقید کا نشانہ بنایا گیا ہے۔ ناقدین کا کہنا ہے کہ ان کا ای میل غیرمحفوظ اور حکومتی اصول و ضوابط کے خلاف تھا۔ ایف بی آئی ہیلری کلنٹن کے ای میل سرور کی سکیورٹی کی جانچ پڑتال کر رہی ہے۔ اس سے قبل ہیلرکلنٹن نے اپنی ذاتی ای میلز کے ہزاروں صفحات منظرعام پر لائے گئے تھے تاہم اس وقت ای میل سرور کسی کے حوالے نہیں کیا تھا۔ ان کے وکلا ای میلز پر مشتمل ڈرائیوز بھی ایف بی آئی کے حوالے کر دیں گے۔ صدارتی انتخابات کے دوران ای میل کا تنازع ایک اہم پہلو بن کر سامنے آیا جس کی وجہ سے انھیں’ناقابل اعتبار‘ قرار دینے کے رجحانات میں اضافہ ہوا ہے۔